Մատթեոս և Մարկոս ավետարանիչները ներկայացնում են քանանացի կնոջ զարմանահրաշ հավատի պատմությունը: Տյուրոսի և Սիդոնի սահմանների մոտ Քրիստոսին հանդիպած հեթանոս այս կինն աննկարագրելի հավատի տեր էր: Նա չնեղսրտեց նույնիսկ այն դեպքում, երբ նրա երկարատև թախանձանքներից հետո Հիսուսն ուշադրություն չդարձրեց նրան, երբ աշակերտների բարեխոսությունն անգամ արդյունք չտվեց, և երբ Տերն Ինքը մերժեց նրան՝ համեմատելով նրան շան հետ: Անգամ այսքանից հետո այս կինն իր զորավոր հավատի շնորհիվ ի վերջո արժանացավ Տիրոջ ողորմությանն ու առողջացած, դևից ազատված գտավ իր աղջկան: