Վանքը գտնվում է Կոտայքի մարզի Բուժական գյուղի հյուսիս-արևելյան կողմում՝ պատմական Նիգ գավառում` Թեղենիս լեռան լանջին։ Լեռն ու վանքն իրենց անունը ստացել են այդտեղ աճող թեղիներից։ Վանական համալիրի հնագույն կառույցը եղել է Սուրբ Աստվածածին եկեղեցին, որ կառուցվել է 6-7-րդ դարերում։

Մաքենյաց վանքը գտնվում է ՀՀ Գեղարքունիքի մարզի Մաքենիս գյուղում։ Վանքի հիմնական եկեղեցին՝ Սբ Աստվածածինը, կառուցվել է 851 թ. իշխանուհի Մարիամի որդի Գրիգոր Սուփան իշխանի կողմից։ Մաքենյաց վանքը եղել է միջնադարյան Հայաստանի մշակութային և կրթական կարևոր կենտրոններից։

Մորո Ձորո կամ Ծռվիզի վանքը գտնվում է Հայաստանի Տավուշի մարզի Լուսահովիտ  գյուղի հարավ-արևմտյան ձորակի աջ ափին։ Հավանաբար կառուցվել է 5-7-րդ դարերում։ Իսկ Նոր Վարագավանքը գտնվում է նույն մարզի Վարագավան գյուղի մոտակայքում և հիմնվել է 12-րդ դարում Դավիթ Բ Կյուրիկյան թագավորի կողմից։

Երերույքի տաճարը կամ Երերույքի Սուրբ Կարապետ վկայարանը 4-5-րդ դարերի շինություն է՝ անտիկ ճարտարապետության տարրերով: Այն գտնվում է Շիրակի մարզի Անիպեմզա գյուղի մոտ:  Տաճարի հարավային պատին հունարեն փորագրված է 92-րդ սաղմոսի հետևյալ խոսքը. «Սրբությունը վայել է քո տանը, Տեր, երկար օրեր»: 

Համարվում է, որ այս եկեղեցին կառուցվել է Դ դարում Գնթունյաց իշխանների կողմից։ Գտնվում է Արագածոտնի մարզի Ապարան քաղաքում։ Վերանորոգվել է 1877 թվականին։ Եկեղեցին իր անունը ստացել է այդտեղ ժամանակին պահվող Տերունական Խաչափայտի մասունքից ։

Կարսի Առաքելոց եկեղեցին կառուցվել է 940-ական թվականներին հայոց Աբաս Բագրատունի արքայի օրոք։ Եկեղեցու շենքն այսօր ևս կանգուն է, սակայն վերածվել է մզկիթի։ Իսկ Բազենից վանքը գտնվել է Մեծ Հայքի Վասպուրական նահանգում,  կառուցվել  կամ վերականգնվել 15-րդ դարում։ Մեզ հասել է այս վանքում ստեղծված մի քանի ձեռագիր։