ծրագրեր 
Շաբաթ - 17:00, 03:00
«Հայելի» հաղորդաշարի նպատակն է արտացոլել այն երևույթները, իրավիճակները, մարդկային և հասարակական փոխհարաբերությունների հակասությունները, որոնք առաջին հայացքից գուցե հրատապ կամ կարևոր չեն երևում, սակայն, այդուհանդերձ, ազդում են նույն այդ փոխհարաբերությունների և մեր կյանքի որակի վրա:
Քաղաքական ու ընտրական տեխնոլոգիաների մասնագետ Արմեն Բադալյանը վստահ է, որ ԱԺ-ում ներկայացված և նաև արտախորհրդարանական ուժերը արտահերթ խորհրդարանական ընտրություններում հաջողություն արձանագրելու համար «ռեբրենդինգի» կարիք ունեն: Հակառակ դեպքում ԱԺ կարող է մտնել ընդամենը 2-3 ուժ:
Նիկոլ Փաշինյանը ՀՀ վարչապետի պաշտոնին ընտրվեց՝ ունենալով ժողովրդի գերակշիռ հատվածի աջակցությունն ու վստահությունը: Ի՞նչ քայլեր պիտի անի նոր կառավարությունը՝ պահպանելու և չմաշեցնելու ունեցած վստահությունը: Այս թեմայով զրուցում ենք Միջազգային և անվտանգության հարցերի հայկական ինստիտուտի ղեկավար Ստյոպա Սաֆարյանի հետ:
«Արի տուն» ծրագիրը և յուրաքանչյուր սփյուռքահայից 1000-ական դոլար «հոգու պարտք» գանձելու՝ սփյուռքի նախարարության ջանքերը, փաստորեն, կարելի է տապալված համարել: Ի՞նչ միջոցներով է հնարավոր արդյունավետ դարձնել Հայաստան-սփյուռք կապը: Հաղորդման հյուրն արևելագետ Արաքս Փաշայանն է:
1918 թվականին հռչակվեց Հայաստանի առաջին հանրապետությունը: Հայաստանը հաջողեց ձևավորել պետականությունը խորհրդանշող ինստիտուտներ, ունենալ ազգային դրամ, կանոնավոր բանակ... Այդուհանդերձ, առաջին հանրապետությունը կարողացավ գոյություն ունենալ միայն 2,5 տարի: Ի՞նչ պայմաններում ստեղծվեց այն ու որո՞նք էին հանրապետության կործանման պատճառները: Հաղորդման հյուրն է պատմական գիտությունների դոկտոր, պրոֆեսոր Էդիկ Մինասյանը:
Քաղաքագետ Սարո Սարոյանի կարծիքով՝ քանի դեռ ԱԺ-ում ձայների մեծամասնություն ունի ժողովրդի վստահությունը չվայելող ՀՀԿ-ն, քանի դեռ ՀՔԾ-ն, գլխավոր դատախազը, քաղաքապետը և նախկին իշխանության այլ հենարաններ շարունակում են ազդեցության լծակներ ունենալ, հեղափոխությունը չի կարելի ավարտված համարել։
Մայիսի 8-ին վարչապետ ընտրված Նիկոլ Փաշինյանն արդեն նոր նշանակումներ է կատարել. ՀՀ ոստիկանապետի պաշտոնում Վլադիմիր Գասպարյանին կփոխարինի Վալերի Օսիպյանը, ԱԱԾ պետ Գեորգի Կուտոյանին՝ Արթուր Վանեցյանը: Այս նշանակումներն այնքան էլ միանշանակ չեն ընկալվել, հատկապես՝ Վալերի Օսիպյանի նշանակումը: «Մոդուս վիվենդի» կենտրոնի տնօրեն Արա Պապյանը՝ կադրային նոր նշանակումների և վարչապետից ակնկալվող փոփոխությունների մասին:
Մայիսի 1-ին ՀՀ ԱԺ-ը մերժեց ՙԵլք՚ խմբակցության ղեկավար Նիկոլ Փաշինյանի թեկնածությունը վարչապետի պաշտոնում: Ներքաղաքական այս ճգնաժամը լուծելու միակ բանական ելքը ՀՀ ԳԽ և ԱԺ նախկին պատգամավոր, քաղաքագետ Վիգեն Խաչատրյանը համարում է ժողովրդի թեկնածու Նիկոլ Փաշինյանի թեկնածությանը կողմ քվեարկելը:
Հ.Գ. Հաղորդումը ձայնագրվել է մայիսի 2-ին՝ մինչև ՀՀԿ-ի հայտարարությունը, թե մայիսի 8-ին՝ վարչապետի հաջորդ ընտրության օրը, Հայաստանը կունենա վարչապետ և որ ՀՀԿ-ն իր թեկնածուին չի առաջադրելու:
Վարչապետ Սերժ Սարգսյանը ապրիլի 23-ին հրաժարական ներկայացրեց: Երկրում սահմանադրական ճգնաժամ է. խորհրդարանական ուժերի ձայների հարաբերակցությունը չի ներկայացնում ժողովրդին: ԱԺ-ում մեծամասնություն է դե ֆակտո ժողովրդի վստահությունը չունեցող ՀՀԿ-ն: Ի՞նչ զարգացումներ են հնարավոր: Մեր զրուցակիցն է Արցախի Հանրապետության նախկին արտգործնախարար, դիվանագետ Արման Մելիքյանը:
Ոստիկաններով, փշալարերով շրջապատված ԱԺ շենքում ապրիլի 16-ին միաձայն քվեարկությամբ ՀՀԿ-ն և ՀՅԴ-ն առաջադրեցին Սերժ Սարգսյանի թեկնածությունն իբրև վարչապետի: 2014-ի ապրիլի 10-ին Ս. Սարգսյանը հրապարակավ խոստացել էր չհավակնել վարչապետի պաշտոնին և ասել էր, որ մարդը երկրի կառավարման ղեկին իր կյանքում 2 անգամից ավել չպետք է լինի: Ս. Սարգսյանը դրժեց իր խոստումը: Տասնյակ հազարավոր ՀՀ քաղաքացիներ անհնազանդության խաղաղ ակցիաներ են անցկացնում մայրաքաղաքում և Հայաստանի մյուս քաղաքներում: Զրույց քաղաքական վերլուծաբան Էդգար Վարդանյանի հետ…
ՀՀ ԿԳՆ-ն կառավարության հաստատմանը ներկայացրել է նոր նախագիծ՝ խորհրդավոր «Սովորողների ռազմահայրենասիրական դաստիարակության նոր ռազմավարություն» վերնագրով: Այս նախագծով ենթադրվում է պայքարել սովորողների «անդաստիարակության, թմրամոլության, սեռական այլասերվածության, օտար մշակույթներին հաղորդակից լինելու» և մահացու այլ մեղքերի դեմ: Կրթության ոլորտի փորձագետ Սերոբ Խաչատրյանը՝ ռազմահայրենասիրական դաստիարակության վտանգների մասին:
Ապրիլյան պատերազմից 2 տարի անց իշխանությունները խոսում են քաղած դասերի, առաջնագիծն ամրապնդելու մասին, թեև տակավին ս.թ. մարտի 17-ին գլխավոր դատախազությունը դարձյալ քրեական գործ հարուցեց ՊՆ բարձրաստիճան պաշտոնյայի դեմ՝ կոռուպցիայի մեղադրանքով: Արցախի նախագահի խորհրդական Տիգրան Աբրահամյանը՝ այս երկու տարում «քաղած դասերի» մասին….
Հիսուս Քրիստոսի Հարությունը չափազանց կարևոր խորհուրդ է, կարելի է ասել, ուղերձ՝ ուղղված յուրաքանչյուրին՝ անհաղորդ, անկենդան վիճակից կյանքին վերադառնալու առումով: Ազգագրագետ Հրանուշ Խառատյանը՝ Ավագ ուրբաթի և, առհասարակ, Քրիստոսի Հարության տոնին նվիրված ժողովրդական ծեսերի մասին:
Արցախի նախագահ Բակո Սահակյանի այցը ԱՄՆ և դրա քաղաքական հետևանքները մեկնաբանում է արտակարգ և լիազոր դեսպան, Ռուս-հայկական (Սլավոնական) համալսարանի համաշխարհային քաղաքականության և միջազգային հարաբերությունների ամբիոնի վարիչ Արման Նավասարդյանը:
Քաղաքագիտության դոկտոր, պրոֆեսոր Լևոն Շիրինյանը չափազանց սկզբունքային է համարում կառավարման խորհրդարանական կարգին անցնելուց հետո հռչակել Հայաստանի չորրորդ հանրապետության ծնունդը: Հիմնավորումները՝ զրույցում:
Հին Երևանի, խորհրդային շրջանի ճարտարապետական արժեք ունեցող շենքերը քանդելը տարերայի՞ն գործողություն է, թե՞ համակարգված:
Մեր հյուրն է արվեստի քննադատ, համադրող Ռուբեն Արևշատյանը:
«Հայաստանի ընդերքը ողջ ժողովրդի սեփականությունն է: 70 տոննա ոսկին, որը գնահատված է 3 միլիարդ դոլար, ՀՀ կառավարության համաձայնությամբ դուրս տանել երկրից՝ փոխարենն աշխատատեղեր ստեղծելով և պետբյուջե 498 միլիոն դոլար հարկ մուծելով… Չե՞ք կարծում, որ հասարակության և բնապահպանների տագնապները տեղին են»: Այս և Ամուլսարի ոսկու հանքի շահագործման հետ կապված այլ հարցերի պատասխանում է «Լիդիան Արմենիա» ընկերության կայուն զարգացման տնօրեն Արմեն Ստեփանյանը:
Նախագահ Իլհամ Ալիևը Ադրբեջանի նախագահական արտահերթ ընտրություններից առաջ ռազմատենչ հայտարարություններ է անում: Նա սպառնացել է օգտագործել բոլոր հնարավոր լծակները՝ Հայաստանին մեկուսացման մեջ պահելու առումով: Ինչպե՞ս է Հայաստանն արձագանքում նման հայտարարություններին: Մեր հյուրն է ադրբեջանագետ Աշոտ Մովսիսյանը:
Հայաստանում առողջապահությանը հատկացվում է ՀՆԱ-ի 2 տոկոսը: ՄԱԿ-ի տվյալներով՝ սա աշխարհի ամենացածր ցուցանիշներից է: Պետությունն ի վիճակի չէ լուծելու իր քաղաքացիների առողջապահական խնդիրները: Եվ այդ գործն իրենց վրա են վերցնում անհատներ ու բարեգործական խմբեր: «Օգնենք հայ մանուկներին» ՀԿ-ն փետրվարի 18-ին՝ ժ. 16.00-ին, «Մեցցո» ակումբում կազմակերպում է բարեգործական համերգ, որի ողջ հասույթը կուղղվի 7-ամյա Զարուհի Բալյանի բուժմանը:
Բնապահպանները հաշվարկել են, որ Ամուլսարի ոսկու հանքի շահագործման դեպքում օդին, ջրային համակարգին, հողային տարածքներին, բուսական և կենդանական աշխարհին հասցվելիք վնասի չափն անդառնալի է: Հայաստանի Կանաչների միության նախագահ Հակոբ Սանասարյանն այս պնդումը հիմնավորում է կետ առ կետ:
ՀՀԿ նախագահի թեկնածու Արմեն Սարգսյանը կկարողանա՞ դառնալ ինքնուրույն խաղացող և համակարգի ներսում փոփոխություններ իրականացնել, թե՞ կլինի ինչպես վարչապետ Կարեն Կարապետյանի դեպքում: Քաղաքական վերլուծաբան Էդգար Վարդանյանը էական փոփոխություններ չի սպասում:
Հեղինակ-կատարող, Հայաստանի Բարդերի ակումբի հիմնադիր Վախթանգ Հարությունյանը՝ իր երգերի նոր՝ 7-րդ ալբոմի ու հեղինակային երգի առանձնահատկությունների մասին:
Աշխարհի ամենահարուստ հանրագիտարանը՝ Վիքիպեդիան, 17 տարեկան է: Հայկական Վիքիպեդիան այսօր 237 000 հոդված ունի: Քչերը գիտեն, որ այդ հոդվածները գրող և կազմող մարդիկ այդ աշխատանքն անում են սեփական ոգեշնչվածության հաշվին, առանց վարձատրության, քանի որ Վիքիպեդիայի փիլիսոփայությունը հենց դա է՝ լավ, օգտակար գործ անել՝ կամավորության սկզբունքով: Մեր տաղավարում մարդիկ են, որոնք իրենց գիտելիքներն ու ժամանակը ներդնում են հայկական Վիքիպեդիան հարստացնելու գործում՝ Արամ Սողոմոնյան (2017 թ. լավագույն վիքիպեդիստ), Համեստ Մելիքյան (ֆիզիկոս, խմբագիր), Սուսաննա Մկրտչյան («Վիքիմեդիա-Հայաստան» գիտակրթական ՀԿ-ի նախագահ):
Դեկտեմբերի 28-ին իրանցիները դուրս էին եկել փողոց՝ բողոքելու թանկացումների դեմ: Կարճ ժամանակ անց ցուցարարները սկսեցին հակաիշխանական կոչեր հնչեցնել: Ոստիկանների և ցուցարարների բախումից 20-ից ավելի զոհեր եղան: Հայաստանը չափազանց զգայուն է արձագանքում Իրանում տեղի ունեցող ցնցումներին: Իսկ թե ինչու, պարզաբանում է ԵՊՀ իրանագիտության ամբիոնի դասախոս, բ.գ.թ. Արմեն Իսրայելյանը:
Սուրբ Ծննդի թեման՝ գրականության ու երաժշտության մեջ: Հաղորդման հյուրերն են Դանիել Երաժիշտն ու գրականագետ Անի Փաշայանը:
