Հայացք
«Հայացք»-ը խորքային զրույցների հարթակ է։ Այստեղ Թովմաս Առաքելյանի հետ փորձում ենք ուսումնասիրել տարբեր գործիչների, մտավորականների հայացքները` թեմաների լայն ընդգրկմամբ։
Արա Գևորգյան․ Լռելը բացարձակ ճիշտ չէ
Արա Գևորգյանի հետ զրույցն ավելի լարված ստացվեց։ Մի կողմից՝ խնդիրներն են ծանր, մյուս կողմից՝ պարոն Գևորգյանի հայացքն է արտասովոր։ Այնուամենայնիվ, երաժիշտն ու հանրային գործիչը ի՞նչ պատախանատվություններ ունի, ինչպե՞ս պետք է գործի բարդագույն պահերին, ի՞նչ ճանապարհներ կան մշակութային ու կրթական «փոսերը» լցնելու։ Փորձել ենք ոչ թե պատասխանել, այլ մտածել բարձրաձայն։ Երևի հենց այդպես էլ ծնվում են պատասխանները․․․
Հրանտ Թոխատյան․ Ամենամեծ չարիքն անկրթությունն է
Հրանտ Թոխատյանը ոչ միայն դերասան է, այլ նաև ուսուցիչ։ Արվեստի ու կրթության, բեմի ու դպրոցի խաչմերուկում է, որ փորձել ենք գտնել մի շարք մարտահրավերների հաղթահարման բանալիներ։ Եղիշեն 5-րդ դարում է արձանագրել՝ բոլոր չարիքները մտնում են մարդու մտքի մեջ տգիտությունից։ Թող որ այս հայացքն էլ մի կաթիլ դառնա՝ հանուն արժեհամակարգի։
Դերասանուհի Նարինե Գրիգորյան․ Չեմ հանձնել զենքերս
Նարինե Գրիգորյանի հետ ենք զրուցել։ Կին, որն առաջնորդում է Երևանի պետական համազգային թատրոնը, իբրև գեղարվեստական ղեկավար՝ ուղղորդում, որ արվեստը մաքրագործի և օգնի չհանձնվել։ Արցախում անցկացրած մանկության, հաղթական օրերի մասին ժպիտով և վճռականությամբ է պատմում, այնպես, որ էլ լեզուդ չպտտվի այդ տարիները «մութ ու ցուրտ» անվանել։ Հայացքով, ժեստերով, խոսքով և իմաստությամբ փոխանցվող այս հայացքն ազգայինը գնահատելու, չկոտրվելու մասին է։
Գնդապետ Ալեքսան Մինասյան․ Ես հոգնեցի վախենալուց
Քաղաքական գիտությունների թեկնածու, ռազմական և հասարակական գործիչ Ալեքսան Մինասյանի հետ զրուցելիս ակամայից շատ ես օգտագործում «առաջին» բառը․ հայկական առաջին ռազմամարզական վարժարանն է հիմնադրել, կատարել Հայոց բանակի առաջին պարաշյուտադեսանտային թռիչքը, իր ձեռքով հանձնել է լեյտենանտի առաջին ուսադիրները, երբ Ռազմական ինստիտուտի պետն էր․․․ Արդյո՞ք բարդ է առաջինը լինելն ու առաջնորդելը, ինչպե՞ս է պետք հաղթահարել վախերը և ի՞նչ է հաղթանակն ընդհանրապես․ զրուցել ենք այս և մի շարք այլ հարցերի շուրջ։
