Ինչ է ուսուցանում Հայ Առաքելական Ուղղափառ Սուրբ Եկեղեցին հավատքի մասին: Որն է մեր Եկեղեցու սրբազան ավանդությունը: Որոնք են մեր դավանության սկզբնաղբյուրները: Ինչ առանձնահատկություններ ունի հայ աստվածաբանական միտքը: Որն է մեր հայրերի ճանապարհը և ինչով է այն տարբերվում քրիստոնեական մյուս ուղիներից:

Յուրաքանչյուր կրոնական համակարգի իսկությունը ստուգվում է այդ համակարգով իրագործված պատմական փորձառությամբ: Հայ Առաքելական Ուղղափառ Սուրբ Եկեղեցին ունի հսկայական և անգերազանցելի պատմական ժառանգություն՝ իրագործված գիտելիք, որ հաստատված և նվիրականացած է Եկեղեցու հայրերի, սուրբերի, վկաների փորձառությամբ և կենդանի բարեխոսությամբ: Յուրաքանչյուր ոք կարող է իր ապրումները համեմատել այդ փորձառության հետ` տեսնելու համար՝ ճի՞շտ է ընթանում արդյոք, չի՞ շեղվել: