Ճաշակի մասին ենք զրուցել այս անգամ, ասել է թե՝ կրթության, արվեստի, որակի և հայրենիքի մասին: Այո՛, ճաշակը մարդու հավաքական նկարագիրն է, որից բխում են ճակատագրական ընտրություններ: Բարի դիտո՜ւմ:

Ցավոք, մեր օրերում հաճախ չէ, որ հնարավորություն ենք ունենում լսելու անաղարտ, բարձր հայերեն խոսք։ Լուիզա Ղամբարյանի հետ քրիստոնեության, մայրության, կրթության ու մշակույթի մասին խոսել ենք այնպես, որ մայրենիի գեղեցկությունը զգաք լիուլի։ Բարի դիտում։

Սահմանապահ Տավուշ աշխարհից Արման Նավասարդյանը հայտնի դերասան է, ռեժիսոր, դասախոս։ Զրույցում անդրադարձել ենք նրա զինվորական ծառայությանը, մանկության հուշերին, արածին և մեծ անելիքներին։

Սուրբ Ծննդյան և Ամանորի տոնական օրերին ամենուր զգում ես հրաշքի սպասումը։ Իսկ ինչ է հրաշքը, ինչպես այն գտնել կամ, եթե արդեն իսկ գտել ենք, ինչպես արժևորել և դարձնել մնայուն։ Այս մասին զրուցել ենք սիրված հոգևորական Դավիթ սարկավագի հետ։

Ոճաբանությունն ու դիզայնը, այո, արվեստ է, իսկ արվեստը` հաճախ սկանդալային։ Արամ Նիկոլյանի հետ այս մասին ենք զրուցել` պարզաբանելով, խորհրդածելով և վերլուծելով։ Բարի դիտում։

Վախերն ու լեռները, կյանքի ամենատարբեր հանգամանքներն ու դրանցում քրիստոնյա մնալու խիզախությունը, պատերազմն ու ապաշխարությամբ վերքերն ամոքելու կարևոր թեմաներն են դերասան Գևորգ Գրիգորյանի հետ զրույցի առանցքում։

Առաջին անգամ Անահիտ Կիրակոսյանի հետ Նարեկացուն նվիրված միջոցառման ժամանակ ենք հանդիպել։ Նարեկացու մասին և նարեկյան գաղափարներով էլ զրուցեցինք այս անգամ։ Քրիստոնյա ծնող լինելու, շնորհակալության և մարտահրավերների մեջ չփլուզվելու մասին է այս «Հայացքը»։

«Հանձնվել չկա՛» և «Կյանքը երկրորդ փորձից»․ Անի Քոչարի երկու գրքերը լավագույնս բնութագրում են պայքարի այն գաղափարախոսությունը, որի դրոշակակիրն է նա։ Հույսի հաղթանակը հրամայական է մեզանում։ Բայց համբերությամբ։ Ինչի մասին էլ զրուցել ենք։ Բարի դիտում։

Արևմտյան Հայաստանը` պատմական մեր Էրգիրը, շատերս ճանաչեցինք, երբ դերասան Սամվել Թոփալյանը մեծ ճամփորդություն ձեռնարկեց և մանրակրկիտ ցույց տվեց, թե ինչ ենք կորցրել: Մեկը կորստի ցավ ապրեց, մյուսը` վրեժի ցասում, երրորդն էլ աշխատելու, արարելու, կրթվելու ուժով լցվեց դա դիտելիս: Այսօր արդեն՝ պատերազմից հետո, այդ ճամփորդությանն այլ հայացքով ենք նայում: Բայց մեր հոգին շարունակում է ձգտել դեպի Տուն. գուցե նաև արվեստի ճանապարհով:

Շատ հետաքրքիր է տեսնել հումորային դերեր կերտած դերասաններին լուրջ, խորքային զրույցի հարթակում։ Դերասան Լևոն Հարությունյանի հետ ենք զրուցել։ Թեև ասաց, որ իր միջի ծաղրածուն էլ է այժմ տխուր, սակայն կարողացավ շատ դրական և հուսադրող հայացք պարգևել։ Բարի դիտում։

Տաթևի վանքում արդեն 17 տարի անձանձիր աղոթում է հայր Միքայելը։ «Հայացքի» հյուրն է մի հոգևորական, որն ունենալով մաթեմատիկական փայլուն կրթություն՝ թողել է աշխարհիկ կյանքը, դարձել նվիրումի ու հավատարմության օրինակ։ Այս զրույցը փորձ է մի փոքր ավելի մոտեցնելու մեզ ճշմարտության հոգևոր ճանապարհներին։

Տեր Մարկոսը Մայր Աթոռի Սոցիալական ծառայության գրասենյակի տնօրենն է: Զուգահեռ` իր երեցկնոջ հետ հիմնել է Ընտանեկան խորհրդատվության կենտրոնը: Որոշեցինք ընտանիքի հետ կապված կարևորագույն հարցերն ուղղել հենց նրան: Բարի դիտո՜ւմ:

Շատ երկար պլանավորված զրույց է սա, ամփոփ հանրայնացումը այն բոլոր քննարկումների, որոնք բազմիցս ունեցել ենք Ռաֆայել Երանոսյանի հետ: Բարի դիտո՜ւմ:

Հոգևոր կյանքն ու Աստծո հետ հարաբերությունները լավագույնս են բացահայտում մարդուն։ Զրուցում ենք շոումեն, հումորիստ, հաղորդավար, պրոդյուսեր, Հայ Առաքելական Եկեղեցու զավակ Գարիկ Պապոյանի հետ այն թեմաներից, որոնց հանրային կերպով գրեթե չի անդրադարձել։ Բարի դիտում։

Եթե երբևէ Աստվածաշունչը, Եկեղեցու հայրերին, մի շարք աղոթքներ եք լսել համացանցում, ապա հավանաբար ճանաչում եք այս ձայնը։ Մեր զրուցակիցը դերասան Բաբկեն Չոբանյանն է, ով կիսում է իր քրիստոնեական, հոգևոր փորձառությունը, մտահոգություններն ու լուսավոր հույսը։

Սկսում ենք «Հայացքի» երկրորդ եթերաշրջանը։ Այս անգամ մեր տաղավարում, որն արդեն իսկ հայտնի է իր անսվաղ անկեղծությամբ և բետոնե ամրությամբ, Տեր Մեսրոպ քահանա Արամյանն է` աստվածաբան, գիտնական, կրթության ոլորտում մեծ ներդրում ունեցած մտավորական, Նարեկացու «Մատյանի» թարգմանիչ։

Իսկ ո՞վ է ասել, որ երիտասարդ մտավորականը չի կարող լինել բազմակողմանի, հոգևոր և խորքային։ Ամենածանր հարցերի շուրջ զրուցում ենք դերասան, հաղորդավար, երգիչ Ներսես Ավետիսյանի հետ։

Բագրատ սրբազանը սահմանապահ Տավուշ աշխարհի հոգևոր առաջնորդն է։ Վերջին տարիներին, սակայն, նրա խոսքերը համացանցի միջոցով դուրս են եկել Տավուշից, հասել աշխարհասփյուռ հայությանը՝ մխիթարելով, ոգեշնչելով և քաջալերելով շատերին։ Սրբազանի խոսքը շատ բանաձևային է․ զրույցում փորձել ենք անդրադառնալ մի քանի առանցքային բանաձևերի։

Ավետ Բարսեղյանին ճանաչում ենք իբրև հաղորդավար, գիտենք նրա գրած բազում երգեր, բայց վերջերս կարողացանք համացանցում կարդալ նրա բանաստեղծությունների մի փոքր մասը։ Այս զրույցում շեշտը դրել ենք հենց պոեզիայի վրա։ Միասին վերլուծենք Ավետի բանաստեղծությունները քրիստոնեական հայացքով։

Զրույց բեմադրիչ, դերասան Դավիթ Հակոբյանի՝ թատերական արվեստի գիտակ մեր բարի պապիկի հետ։