«Վէմ» ռադիոկայանն օգնում է հայությանը վերամիավորվելու ազգային ու հոգևոր մշակութային ժառանգության շուրջ և տարածելու այն:

Հիմնադիրների թվում են կրոնական հետազոտությունների, հրատարակչական գործի, բարեգործության, խորհրդատվության և այլ ոլորտներում առաջատար դիրքեր զբաղեցնող գործիչներ, ինչպես նաև սփյուռքահայ կառույցների հանրահայտ դեմքեր, այլ անձինք: 

«Վէմը» «Գանձասար» աստվածաբանական կենտրոնի գիտական գործունեության իրավահաջորդն է: «Գանձասարի» ավելի քան 60 հրատարակությունները «Վէմի» և նրա առաքելության հիմնարար, մտավոր ու բարոյական հենքն են:

 «Վէմը» ռադիոհաղորդումների ծրագիրը նախաձեռնել է 2000 թ. վերջին: Փաստացի դրանք հեռարձակվել են 2002 թ. հունվարից (FM 101,6, Երևան), իսկ ռադիոկայանը պաշտոնապես բացվել է 2002 թ. ապրիլի 7-ին: Հայ հոգևոր երաժշտության համապարփակ թվային գանձարան ստեղծելու նպատակով «Վէմ ռիքորդինգզ»-ը նախաձեռնել է մեծ ծրագիր` փաստագրելու հայ հոգևոր հնագույն երաժշտությունը արևմտյան նոտագրությամբ և տարածելու այն աշխարհում: Արդիական սարքավորումները հնարավորություն են տալիս բարձրակարգ ձայնագրություններ անելու ինչպես ստուդիայում, այնպես էլ Հայաստանի միջնադարյան եկեղեցիներում ու վանքերում: 

«Վէմի» ստուդիաների ձևավորման համար հանրապետական «Ակուստիկ» գիտական կենտրոնը 2004 թ. մարտին արժանացել է «Եվրոպայի կամար» («The Arch of Europe») ոսկե մրցանակին` «Որակ և տեխնոլոգիաներ» անվանակարգում:
Սեփական լսարանն ընդլայնելու և ավելի մեծ թվով մարդկանց հասանելի դառնալու նպատակով 2004 թ. «Վէմը» ստեղծեց հեռուստատեսային արտադրության սեփական` «Վէմ մեդիա արվեստներ» ստուդիան: